GUX-Aasiaat nutaamik rektorertaartoq
Dorthie Siegstad Avannaani Ilinniarnertuunngorniarfimmi 1997-imi atorfinippoq, tassanilu ilaatigut ilinniartunik siunnersuisuusimalluni allaffissornermillu nakkutilliisuusimalluni.
Kalaallit oqaasiinik kulturimut tunngasunik atuartitsinerup saniatigut ilinniartunik siunnersuisutut ilinniaqqinnikuuvoq oqaloqatiginnattartutullu piginnaasaqarluni.
Ilinniaqqinnermini kingullermi ilinniarnertuunngorniarfinnik aqutsinermik aaqqissuussinermillu Syddansk Universitet-imi piginnaanngorsaqqippoq aamma ilinniarnertuunngorniarfinni perorsaanikkut ilinniartitsinikkullu Mastergradimik soraarummeeruteqarsimalluni.
Dorthie Siegstadi atorfeqarnermini Aasianni sulisimavoq inooqatinilu marlunnik qitornaqarlutik.
- Qilanaarpunga ilinniarnertuunngorniarfik nukittorsarlugu ilinniarnertuunngorniarfimmi suleqataasunik, ilinniartunik aamma angajoqqaanik suleqateqalernissara. Neriuppunga meeqqat atuarfii, ilinniarfiit allat, Aasianni innuttaasut qinikkallu peqatigalugit ilinniarnertuunngorniarfik inuiaqatigiinni nukittorsarneqarumaartoq. Suleqatigiinnermi siunertaajumaassaarmi inuusuttut ilinniagaqarusussusiisa nukittorsartuarnissaat. Inuiaqatigiit kivissinnaajumallugit inuusuttut tamaasa nunatta pisariaqartippai, tusagassiuutinut nalunaarummi Dorthie Siegstad taama oqarpoq.
