Guvernørip USA-mi naalakkersuisut eqqartuussivimmut tunniunnialerpai
Suliassiissummi ilaatigut taaneqarpoq, Alaskap akerliuneranut pissutaasoq, uumasut nungutaalersut allattorsimaffiinut nannut ilanngunneqarpata, taava Alaskami nunarujussuarni eqqissisitani, uuliamik gassimillu qalluisoqarsinnaajunnaassasoq. Uuliamik qalluisalernissaq aningaasarsiutaalluartussatut naatsorsuutigineqarpoq.
Chuckchip imartaani, nannunit najugaqarfigilluarneqartumi, uuliamik gassimillu qillerilluni misileraanissamut pisinnaatitaanissamut
uuliasiutileqatigiiffiit 2,7 milliardi koruuninik Alaska qanittukkut neqeroorfigaat. Nannut nungutaalersutut nalilerneqarnerisa kinguneranik gassimut ruujorimik ikkussuinissaq aamma piviusunngunngitsoortissinnaavaa. Ruujorinik ikkussinissaq ”Guutip piumasaa”-tut Sarah Palinip taagaluarpaa.
Sarah Palin USA-mi nunanut allanut ministerimut siorna allappoq, oqarluni, nannut amerlassusaat ajunngitsoq, inunnillu toqqaannartumik navianartorsiortinneqanngitsut. Misissuisitsinermit uuliasiortitseqatigiiffimmit ExxonMobilimit aningaasaliiffigineqartup assilinera, allakkaminut ilanngullugu nassiuppaa. Eqqartuussivitsigut suliassanngortitaq, 2009-mi januaarimi eqqartuussivimmi suliarineqassaaq.
Sarah Palin, Demokratillu præsidentip tullersortaatut qinigassanngortitaat, Joe Biden, tv-kkut siullermik kingullermillu aqagu oqallitsinneqassapput, oqallinneq
isiginnaartartunit 2 millioninit malinnaaffigineqarnissaa naatsorsuutigineqarpoq.