Guvernøri: Beirutimi ajunaarnersuaqarnera milliardinik naleqartoq

Beirutip affaani aseruatiterneqartoq, illoqarfiup guvernøriata oqaatigaa. Inuillu 200.000-it angerlarsimaffeerutsinneqarput.
Inuit ikinnerpaamik 100-t qaartoortoqarnerani ajunaarsimasut kisitsisit kingulliit takutippaat. Assi © : AFP/Ritzau Scanpix
Allattoq Ritzau
aggustip 05-at 2020 09:09

Libanonimi Beirutip umiarsualiviani ippassaq qaartoornerujussuarmi aseruatiternerit ikinnerpaamik 3 milliardit dollarinik, tassa 19 milliardit koruuningajannik naleqarput.

Beirutip guvernøria Marwan Aboud taama naliliivoq.

Illoqarfiup affaa sinnerlugu aseruatitertoq, taassuma oqaatigaa. Nutaarsiassaqartitsivik Ritzau taama allaaserisaqarpoq.

Inuit ikinnerpaamik 100-t qaartoortoqarnerani ajunaarsimasut kisitsisit kingulliit takutippaat.

Marwam Aboud naapertorlugu Beirutimi innuttaasut akornanni 200.000-it qaartoortoqarnerani angerlarsimaffeerutsinneqalerput.

- Beirutimi qatserisartut qulit annaaavagut, aseruatiternerillu 3 aamma 5 milliardit dollarit akornanni naleqarput, amerlanerunngikkunilluunniit, Aboud oqarpoq.

Libanonip præsidentiata Michel Aounip Twitterikkut ippassaq marlunngornermi allaaserisaa naapertorlugu ammoniumnitratimik taaneqartoq 2750 tonsit umiarsualivimmi quersuarmi toqqortaatigineqarsimapput, taakkuuppullu qaartoortut.

Taakku quersuarmi ukiuni arfinilinni toqqortaatigineqarsimapput, isumannaallisaaniarnerlu naammaginarsimanngitsoq Michel Aounip oqaatigaa.

/ritzau/dpa