Gustav sakkukinnerulerluni USA-mut apuuppoq

Kiattup anorersua Gustav ualimut Amerikami nunap immikkoortortaanut Louisianamut apuukkami naatsorsuutigineqaraluartutut sakkortutiginngilaq, taamaattorli anorersuarujussuartut suli sakkortutigaaq taamalu qarsutsinernik pigisanillu aserorteringaatsiarsinnaalluni.
Allattoq Elisa Isaksen
septembarip 01-at 2008 17:16

Gustav USA-mut apuutsinnani sakkukilliimisimavoq nunamullu apuukkami kategori 2-tut sakkortussuseqarluni, tassa tiimimut 175-kilometerinik sakkortussusueqarluni.

Anorersuup nassatarisaanik ulinnersuaqassaaq. Mallillu New Orleans-imi sapusiat qulliit eqqussagunarpai. Oqartussaasulli neriuutigaat mallit sapusiat uppitissanngikkaat.

Taamaattorli anorersuarujussuaq nunamut anngukkuni aseruingaatsiarsinnaavoq. Anorersuarujussuaq sialuttalerujussuuvoq, oqartussaasullu anorersuarujussuarnik kaavittuliortunik nassataqarnissaa mianersoqqussutigereerpaat.