Gudrun Sanimuínak' tammaaneqartoq nassaarineqarunartoq

Kalaallit Nunaanni politiit arfinngornermi marlunut tanneq sisamanngoriiatsiartoq, inunnit marlunnit Qaqortumi Tasersuup eqqaani pisuttuartunit nalunaarfigineqarput, inummik toqungasumik Tasersuarmi takusaqarsimallutik.

Politiit nalunaarutigineqartumut piaartumik ornigupput, tassanilu takusinnaasimavaat, arnaq inuusuttoq ipisimasoq, piffissamilu sivisuumi Tasersuarmiissimasoq.

Ambulancit qatserisartullu aggersarneqarput, arnallu ipisimasup timaa qaqinneqarluni.

- Nassaarfigineqartumi imaluunnit ipisimasup timaani pinerluttuliortoqarsimaneranik takussutissaqanngitsoq, Kalaallit Nunaanni politiit tusagassiuutinut nalunaarumminni allapput.

Ipilluni toqusimasup kamippai kisimik nassaarineqanngillat, Julie Senderovitz Bendtsen, Kalaallit Nunaanni politiini pigaartut pisortaat taama allappoq.

Pigaartut pisortaata ilanngullugu oqaluttuaraa, arnap inuusuttup timaata nassaarineqartup isikkua, atisalersorsimanera angissusialu naapertorlugit tassaassaagunartoq Gudrun Sanimuínak', siorna 2017-imi novembarip qaammataani Qaqortumi tammaaneqartoq.

Gudrun Sanimuínap kamippai, Qaqortumi Tasersuup eqqaani siorna 2017-imi nassaarineqarput.

Tammaaneqartup Gudrun Sanimuínap ilaqutai, Qaqortumi Tasersuarmi arnamik inuusuttumik toqungasumik nassaartoqarneranik ilisimatinneqarput, politiillu ilimagaat nassaarineqartoq tassaassagunartoq Gudrun Sanimuínak'.

Arnap inuusuttup toqungalluni nassarineqartup kinaanera politiinit qulakkeerlugu paasiniarneqassaaq,
toqusup timaanik misissuisoqassalluni, pinerluttuliortoqarsimannginneralu qulakkeerniarlugu  misissuisoqassalluni.