Guantanamo matoqquvaa
USA-mi illersornissamut ministerertaap, Robert Gates-ip, amerikamiut sorsunnermi tigusanut hunnorujulikkaanut parnaarussiviat, Guantanamo, matuneqaqquaa.
Amerikami tusagassiorfiit taama allaaserinnipput.
Guantanamop matuneqarnissaa ministerertaap siunnersuutaasa siulliit ilagaat, kisianni ministereqataasa siunnersuutaata unitsinneqarnissaa piaartumik sulissutigaat.
Sorsunnermi tigusanut parnaarussiviup, Guantanamop, amerikamiut avataanit pitsaasumik isigineqarnerat akornusersorpaa, taama isumaqarpoq amerikamiut illersornissamut ministeriat, Robert Gates. Taanna aamma isumaqarpoq, tigusat Guantanamo-mi eqqartuunneqarnissaat tatiginanngitsoq. Taamaattumik parnaarussiviup amerikamiut peqqarniisaarnianut akiuiniarnerat akornusersorpaa, taamaattumillu piaarnerpaamik matuneqartariaqarluni, illersornissamut ministeri taama isumaqarpoq.
Aviisimi New York Times-imi, præsidentip illorsuani Det Hvide Husimi atorfilinnik kinaanerminnik isertuussisunik oqaloqateqarsimasunit, taama allaaserinnittoqarpoq.
Illersornissamut ministeri Robert Gates decembarimi ivertinneqarpoq, sapaatip akunnerilu arlalialuit qaangiutiinnartut Guantanamop matuneqarnissaa siunnersuutigaa.
Kisianni inatsisinik atortitsinermut ministerip, Alberto Gonzalesip, aamma præsidentip tulliata, Dick Cheneyip, aammami præsident Buship peqqarniisaarniatut pasisat USA-mut nuunneqarnissaat kissaatiginngilaat, tassami taamaalillutik amerikamiut inatsisaat malillugit eqqartuunneqartariaqalissammata.
Taamaattumik illersornissamut ministerip siunnersuutaa peerneqapallappoq.
Kisianni atorfillit oqaatigaat pissutsit allanngoriaannaasut, tassami inatsisinik atortitsinermut ministeri Gonzales atorfilittaminik arfineq-pingasunik soraarsitsisimanini pillugu tunuartitaariaannaammat.
385-it Guantanamomi ullumikkut parnaarussaapput, peqqarniisaarniatut pasisaallutik, kisiannili suli unnerluutigineqaratik. Illersornissamut ministereqarfik naapertorlugu, taakkua ilaat sakkutuut eqqartuussiviannut ukioq manna sassartinneqartussaapput. Guantanamomi tigusaq ataaseq manna tikillugu eqqartuussaareerpoq, tassa australiamiu eqqartuunneqareermat.
Amerikamiut naalakkersuisui Guantanamo pillugu tigusallu pisinnaatitaaffii pillugit avissaartuuteqqapput. New York Times naapertorlugu nunanut allanut ministerip Gondoleezza Rice-p Guantanamop matuneqarnissaa tapersersorpaa, tassami USA-p isigineqarneranut akornutaammat, aammattaaq nunani USA-mut illersuisuusuni.
