GU-rtut imigassaateqaqqussaassanngillat
Avannaani ilinniarnertuunngorniafimmi akerliussutsimik ippassaani unnukkut takutitsisoqarmat ilinniartut 100-inik ikinnerunngitsut peqataapput. Akerliussutsimillu takutitsinermi anguniarneqarpoq;
- Ilinniartut inigisaminni imigassaateqarsimasut mianersoqqussummik tunineqaqqaarlutik anisinneqartalernissaat, Nicki Olsen Avannaani ilinniarnertuunngorniarfimmi ilinniartoq nassuiaavoq.
Avannaani ilinniarnertuunngorniarfiup rektoria, Flemming Guntofte Nielsen akerliussutsimik takutitsisunut oqarpoq malittarisassat allanngortinneqassanngitsut.
- Kollegiani imigassaateqartoqarsimatillugu mianersoqqussummik tunisinani anisitsisarneq ingerlatiinnassavarput. Takusinnaavarpummi malittarisassap atuutilernera atuarfimmut sunniuteqarluartoq. Atuanngitsoortarnerimmi ikilisimapput, kollegianilu imertarneq taamaalilluta aamma annikillisissimallugu.
- Aamma politiit ilisimatitsissutigaat kollegianut orniguttariaarussimallutik, rektor Flemming Guntofte Nielsen oqarpoq.
Taamaakkaluartorli ilinniarnertuunngorniat malittarisassanik qasukkaanissamik anguniagaqarnertik suli aalluppaaat.
Aamma Kalaallit Iliniagaqartut kattuffiannit, KIK-mit, taperserneqarput, kattuffik Inatsisartunut Naalakkersuisunullu maanna ammasunik allagaqarmat.
- KIK-mit sakkortunerpaamik piumasarissavarput Avannaani Ilinniarnertuunngorniarfimmi aqutsisut qulaanit peqquneqassasut taama pissusilersornertik piaarnerpaamik unitseqqullugu, ilinniartullu anisitaasimasut kingumut uterteqqinneqassasut, angummanniarnerminnullu immikkut ikiorneqassasut, KIK-p allaffimmi pisortaa Poul Olsen Naalakkersuisunut inatsisartunullu ilaatigut taama allagaqarpoq.
Ilinniarnertuunngorniarfimmi ilinniarneq augustimili aallartimmat ilinniartut arfinillit kollegiamit anisitaasimapput, taakkunanga sisamat iniminni imigassaateqarsimanertik anisitaassutigisimallugu.