GU-mi ilinniartut atuanngitsuukulavallaarput

Naartuersinnerit, inuttut ajornartorsiuteqarnerit, kollegiani ininik ajornartorsiuteqarneq, meeqqanik napparsimasoornerit GU-mi ilinniartut atuanngitsuukulasarnerinut ilaatigut tamakku peqqutaasarput. Kingullerpaamik periarfissinneqartartut ukiut siuliinut sanilliullugit amerlanerusimaqisut Aasianni, Qaqortumi, Nuummilu GU-mi aqutsisut oqaloqatigisatta tamarmik oqaatigaat.

- Maani Qaqortumi pissutsit imaapput, ukioq manna atuanngitsoortarnerit kisitsisitigut amerlatsinnikuupput. 25 procentimiipput maannakkut siorna 21 procentiugaluarpoq, taama oqarpoq Qaqortumi GU-mi ilinniartitsisoq Bibi Kielsen.

- Ajoraluartumik ukioq manna siornamut sanilliullugu amerlanerupput. Taamatuttaaq Nuummi GU-mi rektorimut tullersortaasoq Pia Rosing Heilmann oqarpoq. Nuummi ilinniartut arfineq-pingasut kingullerpaamik periarfissinneqareersut.

- Ajuusaarnartumik ukioq manna amerlanerusutut oqaatigisariaqarpagut tamanna ajuusaarnaraluarpoq kisianni tassa taamaappoq.

Taama oqarpoq Aasianni GU-mi pisortamut tullersorti Tippu Nielsen.

Aasianni GU-mi ilinniartut katillugit 32-t maannamut kingullerpaamik periarfissinneqareerput.

Rektorilli Aasianniittut Nuummiittullu oqarnerat naapertorlugit siornamut sanilliullugu 100 procentimik tamanna qaffariarsimavoq.

Taama atuanngitsuukulasarnerit assigiinngitsunik peqquteqartinneqarput, Aasianni ukiunut siuliinut sanilliullugu ilinniartut arlaqarnerusut atualersinneqarsimanerat inissaaleqinermik kinguneqarpoq. Tassalu imaappoq ilinniartut 25-nik amerlanaarlugit ukioq kingulleq atualersinneqarsimagamik. Tippu Nielsen ima oqarpoq.

- Imaakkami qullersaqarfimmiit piumasaqarfigineqaratta qinnuteqartut tamaasa tigussagivut. Kisiannili maani avannaani ilinniarnertuunngorniarfimmi inissatigut amigaateqarluta aallartippugut, taamaakkami ilinniartut ilaannut tamanna kingunerlussimasutut oqaatigisariaqarpoq.

- Ilinniartoqarpoq anaanaasunik kisimiittunik, taavalu aamma tamakkua qitornaminnik napparsimatitsigaangamik atuarnerminnik soorunami tunulliussisariaqartarput, Qaqortumi GU-mi ilinniartitsisoq Bibi Kielsen oqarpoq.