Ukioqatigiinngiiaat meeqqat atuarfianni aappaagu naammassinnittussat marluummata, ilinniarfiit ingerlaqqiffiusartut pilersaaruteqarput ilinniarfinnik annertusaaniarlutik.
Avannaani Ilinniarnertuunngorniarfik Aasianniittoq, ukiut tamaasa klassinik nutaanik sisamanik tigusisin-naasartoq maannakkut pilersaaruteqarfiuvoq klassimik ataatsimik tiguseqqissinnaanissaanut. Avannaani Ilinniarnertuunngorniarfimmi Aasianniittumi rektori, Flemming Guntofte Nielsen, oqarpoq, ukiup tulliani meeqqat atuarfiani naammassillutik atuarunnaartussarpassuit sullinniarnissaannut ajornartorsiortussaassallutik:
Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmiit nalunaarfigineqarsimavugut Avannaani Ilinniarnertuunngorniarfimmi atualeqqittoqarnissaannut atatillugu klassimik ataatsimik tiguseqqissasugut. Tiguseqqinnissatsinnullu atatillugu atuarfitsinni kiileri initut
atuartitsiviusinnaanngortillugu iluarsaattariaqarparput, Rektor Flemming Guntofte Nielsen oqarpoq, nangillunilu:
- Klassimik ataasiinnarmik ilaseqqinnissarput naammassanersoq naluara, kisianni tassa atuarunnaartussat qinnuteqartussat GU-mut isernissamut naleqquttut amerlappata, taava taamanikkussamut amerlanerusunik tigusinissamut aaqqiiniartariaqassaagut. Soorunami ajornartorsiortitsisinnaavoq, kisianni taamanikkussamut aaqqinniarneqarumaarpoq.
aamma Aasianni GU-mi atuartunut inissanik amigaateqartoqarpoq, ajornartorsiullu iluarsiniarlugu, Aasianni illoqarfimmi inissianik illunillu attartorneq aqqutigalugu ajornartorsiut iluarsineqartarpoq.
Aamma sanaartorneq maannakkut ingerlanneqartoq, GU-mi pisortaq oqarpoq.
Kollegiami inissat 40-t sanaartorneqarnissaat pilersaarutaavoq, taakkualu juullereernerani naammassineqarnissaat pilersaarutaavoq. Qujanartumik aamma kollegiatoqarsuit ingutserneqarsimanngillat, taakkualu iluaqutaasarput, Flemming Guntofte Nielsen oqarpoq, nangillunilu: -Aappaagornissaanut ernumassutigineqarsinnaasut tassaapput, kollegianik inissaqartitsisinnaaneq, atuartitsiviusinnaasunik naammattunik pissaqartitsisinnaaneq, aammalu ilinniartitsisunik naammattunik pissarsisinnaanissaq.
Nuummi GU-mi ilinniartitsiviusinnaasut amigaataammata, GU-p allisinneqarnissaa pilersaarutaavoq. Atuartut ilutigiinngiiaat marluk meeqqat atuarfiiniit aappaagu aniappata, qinnuteqartullu amerlassappata, Nuup illoqarfittaani atuartitsiviusinnaasunik ujaasisoqartariaqartoq, GU Nuuk nalunaarpoq. Aamma kujataani Qaqortumi, inissiarsuit ilaat kollegiassatut suliarineqassaaq.