GTE takornariaqarneq pillugu Spaniami paasititsiniaavoq
Nunatsinniit peqataasut Malik Milfeldt aamma Nini Biilmann spaniamiumit issittumi angalatuumit, Ramón Larramendimit, tapersersorluarneqarput. Ramón Larramendi sermersuarmi ilisimasassarsiortarnini pillugit filmiliaminik Spaniami TV-kkut arlaleriarluni takutitsisarsimavoq, Spanialu tamakkerlugu aqagu aamma TV-kkut aallakaatitseqqissaaq. Aqagu takutitassaa tassaavoq Avanersuarmi piniartunik TV-kkullu assiliisartunik peqateqarluni sermimi siorna assilisat.
Spaniamiunillu Nunatsinnut tikeraartoqartarneq ingerlalluarpoq. Nunatsinni Takornariaqarnermi Inuussutissarsiornermilu Siunnersuisoqatigiit missingerpaat spaniamiut takornarniat 600-it missaat Kujataanut siorna takornarniarsimasut, spaniamiullugooq Kujataanut takornarniartartut ukiuni kingullerni amerliartuinnarput.
Takornariaqartitsiviit aamma nalunaarutigaat spaniamiorpassuit aasaru Nunatsinnukassamaartut. Umiarsuarsuaq takornariartaat aasaru pernaammik aamma Nunatsinnukassamaarpoq, illoqarfinnut assigiinngitsunut angalassalluni. Takornariartaat tassaavoq "Grand Mistral", taannalu Qaqortumut, Nuummut, Ilulissanut Qeqertarsuarmullu angalassaaq.