GTE siunnersortimik atorfinititsivoq

Nunatsinni Takornariaqarnermi Inuussutissarsiornermilu Siunnersuisoqatigiit, GTE, sulianik ataqatigiissaarisussamik nutaamik atorfinitseqqammerpoq.
Allattoq Jaaku Lyberth
aggustip 19-at 2008 05:32

Suliarissarai EU-mik OLT-millu, tassa nunat qeqertallu imarpik ikaarlugu tikinneqarsinnaasut, suleqatigiiffiannik, siunissami Kalaallit Nunaanni suliffeqarfinnut tunngatillugu tapersersortissarsiornerit paasisanillu paarlaateqatigiinnissat.

- GTE-mi sulininni siunnersortaassaanga, kalaallillu suliffeqarfiisa nunani allani suleqatissarsiorneranni ikiuutissallunga. Aningaasaateqarfippassuit nunarsuaq tamakkerlugu nassaassaasut pillugit ilisimasanik katersissaanga ilisimatitsissutigisassallugillu, 34-nik ukiulik, Jan Mørch Pedersen, Nanortalimmeersoq, oqarpoq.

- Aamma paasisitsiniaanerni, ataatsimiinnerni allanilu nunarsuarmi tamarmi attaveqarfiusuni, killeqarfiit akimorlugit suleqatigiinnernik ammaassisussat suleqataaffigissavakka, erseqqissaavoq.

Jan Mørch Pedersen Cand.scient.soc-imik Aalborgip Universitetiani ilisimatusarsimasuusoq, GTE-mi atorfininnginnermini Bruxellesimi Kalaallit Nunaata aallartitaqarfiani sulinermik ilaatigut misiliisimavoq.