GTE-mi anguniagassat nutaat siunniunneqarput

Nunatsinni Takornariaqarnermi Inuussutissarsiornermilu Siunnersuisoqatigiinni anguniagassat nutaat ilusilersorneqaleruttorput. Nunap immikkoortuinik suleqateqarneq suliffeqarfiullu nittartagaa pitsanngorsagassanut siullernut ilaapput.
Allattoq Else Løvstrøm
juunip 02-at 2010 16:15

- Kalaallit Nunaat nukittooq suleqatigiinnermik aallaavilik pigissavarput, suleqatigiinnerlu akisussaaqatigiinnermik imaqartariaqarpoq. Suleqatigiissagaannilu GTE assigiinngitsutigut sullissisariaqarpoq, nunap immikkoortuisa pisariaqartitaannut assigiinngitsunut tulluarsaalluni. Nunalli immikkoortuisa namminneerlutik oqariartuutiginiagartik ilusilersorsinnaasariaqarpaat, Anders Stenbakken oqarpoq.

Inuussutissarsiornermut takornariaqarnermullu suleqatigiiffinnut, piorsaavinnullu GTE ilannguttariaqartoq Anders Stenbakken isumaqarpoq.

- Immitsinnut isummersoqatigiittariaqarpugut. Nunatsinni ikeqigatta suleqatigiittariaqarpugut unammilleqatigiinnermut akorngutaanngitsumik, Anders Stenbakken oqarpoq.

Greenland.com aamma nutarterneqartussanngorpoq.

- Kommunit nikassarnianngikkaluarlugit isumaqarpunga nittartagaq kommunip nittartagaanut assinguvallaartoq. angalasussanut oqaluttuassaqarluartutut takorluuititsinngippallaaqaaq. Pinnissuseq ersersinnerusariaqarpoq soqutigisallu aallaavigalugit atuisut ujarlersinnaasariaqarput, tassami qajartornermik soqutigisaqaruit apeqqutaanngilaq Kinamiuunersutit, Norgemiuunersutit amerikamiuunersutilluunniit, uanimi ataatsimoorussamik soqutigisaqarneq apeqqutaavoq, Anders Stenbakken oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq