GTE: 2009 takornariaqarnermik suliaqartunut pikkunarsimavoq

GTE-mi attaveqarnermut pisortaq, Anders la Cour Vahl oqarpoq:

- 2009-mi nunarsuatsinni aningaasarliornerup kinguneranik, maani takornariaqarneq eqqorneqartussaasoq naatsorsuutigisimavarput, soorluttaaq aamma nunani allani tamanna misigineqarsimasoq.

Taamali oqareeraanni oqartariaqarpoq, Kalaallit Nunaata eqqorneqarnera annikissimasoq, Anders la Copur Vahl oqarpoq.

- Nunat allat eqqugaanerlunnerit eqqarsaatigalugit, kisitsisit takutippaat maani annikittuinnarmik eqqorneqartugut, Anders la Cour Vahl oqarpoq.

Taassumali isertuutinngilaa takornariartitsisartut suliassakinnerulersimanertik oqaatigisaraat:

- Taamaakkaluartoq suliffinnik matuinnartariaqartunik tusagaqanngilangut. Neriussaagulli 2009-misut misigisaqaqqissanata, Anders la Cour Vahl oqarpoq.

Takornariat takussassarsiorusuttarnerat aammalu tammajuitsussarsiniartarnerat eqqarsaatigalugit, ukioq ajortutut oqaatigineqarsinnaasoq Anders la Cour Vahl-ip oqaatigaa.

Maannamut suli paasineqanngilaq nunap immikkoortui sorliit eqqorneqarnerpaasimanersut:

- Nunami immikkoortortat sorliit imaluunniit illoqarfiit sorliit takornariakillisimanersut suli takussutissaqartinngilagut, tamannali paasiniassavarput, Anders la Cour Vahl oqarpoq, nangillunilu:

- Nunarsuarmioqatitsinnut takoqqusaarnerput nukittorsartariaqarpoq, aningaasarliornermik eqqorneqarpianngitsut ussatarinerullugit.

Taamaattumik maanna GTE suliniuteqarpoq internetti atorlugu takoqqusaarinermik, taannalu decembarimi naammassineqartussaavoq. Suliniut takornarianik nunami angalarusuttunut siunertaqarpoq.

2009-mullu naleqqiullugu ukioq manna takornariaqarneq pitsanngoreersoq, Anders la Cour Vahl-ip erseqqissaatigaa:

- 2010-mi kisitsisaatitta takutippaa siornamut naleqqiullugu ukioq manna pitsaanerusoq, Anders la Cour Vahl oqarpoq.

Umiarsuit takornariartaatit akileraaruserneqartalernerata kinguneranik tikittartut ikileriarsimasut Anders la Cour Vahl-ip ilanngullugu oqaatigaa.