Grønlandsbankip sinneqartoorutai amerleriarput
Aningaaseriviup pisortaata Martin Kviesgaardip naatsorsuutit inernerat iluarisimaarpaa.
- Sullitatta akiliisinnaassusaat pitsaasuuvoq, taamaanginnarnissaalu pingaaruteqarpoq, aningaaseriviup pisortaa oqarpoq.
- Atuisut suliffeqarfiillu namminersortut nunarsuarmi aningaasatigut ajornartorsiornermi annertunerusumik eqqugaanngitsut naatsorsuutit takutippaat.
- Kalaallit Nunaanni aningaasaqarnerup ingerlanerliornerata kingunerisaanik inuussutissarsiutitigut aningaasat kaaviiartinneqartut ikinnerungaluartut, taamaattoq Kalaallit Nunaat Danmarkimisuulli suliffissaaleqinermit nalaanneqanngilaq. Aamma aningaasat erniaasa appasinnerunerat suliffeqarfinnut atuisunullu iluaqutaavoq, Martin Kviesgaard oqarpoq.
Aningaaseriviup Grønlandsbankip aningaasatigut inissisimanera siornamut naleqqiullugu ajunnginnerunissangatinneqarpoq, tassami sinneqartoorutit procentit qulit 20-llu akornanni qaffasinnerunissaat naatsorsuutigineqarmat.
Aningaasanut inatsisissaq killilimmik periarfissiisoq atutilissaaq, inuiaqatigiinnilu ineriartortitsinerup appariartornissaa naatsorsuutigneqarluni,
taamaattumik inuiaqatigiinni suliat piffissami qanittumi annikinneruinnarnissat siulittuutigaarput, Martin Kviesgaard oqarpoq.