Grønlandsbankip hævekortinik akitsuinera ingasagineqarpoq
Grønlandsbankip hævekortinik atuinermut akiliutigititaminik ullumimiit atuutilersumik akitsuinera, atuisartunit tupaallaatigineqarpoq. Nuummi bankip silataani aningaasanik tigusisarfitsigut tigusiniarlutik utaqqisut, hæverkortimik atuinerup akitsornera pillugu Radioaviisip isumasiorpai.
Isumasiunermi oqaaseqarumasut tamarmik hævekortimik atuinerup akitsorneqarnera akisugaat.
- Ingasappallaaqaaq, taava aningaasat ataatsikkut taamaasa tigusalissavakka. Kakkaak!
Aperineqartut oqarput, ataatsilli akitsuineq ingasagingaluarlugu oqarpoq naammagiinnartariaqarlugu, allatulli ajornartumik akissarsiani ataatsikkut tamaasa aamma tigusariaqassallugit oqarpoq.
Grønlandsbankip atuisunut sullissinermini akiliutigititani 1. oktoberimit qaffappaa atuisunut naliginnaasumik kontolinnut bankip karsiani aningaasanik tigusineq ataaseq 20 kroneqalerluni, automatini tigusineq ataaseq 3 krone 75 øre-qalerluni, kiisalu pisiniarfinni hævekortimik aqqaneq marloriarluni atuinerup kingorna atuinerit 2 kroneerutaasalerlutik.
Hævekortimik qaammammut atuinerit amerlappata hævekortimik atuinermut annertunerusumik akiliuteqartalernissaq naatsorsuutigisariaqartoq, taamaattumillu hævekortimik atuineq eqqarsaatigisariaqalernissaa pisariaqassasoq Grønlandsbankip pisortaa Jesper Flensted ullumi ulloqeqqanut radioaviisimut oqarpoq.
