Grønlandsbankimi piginneqataassutinik tunisisoqarnissaa isumaqatigiinngissutaasoq
Aningaasaqarnermut ataatsimiititaliami siulittaasup Finn Karlsenip, Siumumeersup, siulittaasullu tulliata Gerhardt Petersenip, Atassummeersup, taamaaliornissaq pitsaasoraat.
Demokraatit tunisinissaq tunngaviatigut ajorinngilaat, tunisinermili isertitat siunissaq ungasinnerusoq eqqarsaatigalugu iluanaarutigineqarsinnaanngorlugit aningaasaliissutigineqartariaqarnerarlugit.
Brian Buusip GA-meersup Torben M. Andersenillu Aningaasaqarnermut Siunnersuisoqatigiinneersup uungaannaq eqqarsarnertut taavaat.
Maannalu aamma IA qulartunut ilannguppoq, iluanaarutaalluartartup amigartoorutinut matussutissaannartut atorneqarnissaa isumaqataaffiginagu.
- Allaanngilaq kissassimaarniarluni qarlinnut quineq. Ataasiaannartumik isertitaassapput ukiormannaannaq matussutissatut atorneqartussat, siunissaq ungasinnerusoq eqqarsaatigalugu iluaqutissartaqanngilluinnarpoq. Aamma aningaasat isertinneqartut allamut iluanaaruteqarfiusussamut aningaasaliissutiginiarneqanngillat. Amigartoorutinut matussutissatut atornianeqaannarput. Tamannalu isumatusaarnerunngilaq, Naaja Nathanielsen, IA sinnerlugu Aningaasaqarnermut Akileraartarnermullu ataatsimiititaliami ilaasortaasoq oqarpoq.