Grønlandsbanki erseqqissaavigitippoq

Grønlandsbanken aamma eqqorneqartoq, aningaaseriviup atuisartunut pisortaata, Peter Petersenip, nassuerutigaa:

- Atuisartut ombudsmandiata erseqqissaassutaata uagut aamma eqqorpaatigut. Kortinillu ullut ilaanni taarsersuinialerutta atuisartut ombudsmandiata erseqqissaassutaa malikkumaarparput, Peter Petersen KNR-imut oqarpoq.

Taamaammat aningaaserivik kortinik akiliissutinik nutaanik atuisartuminut nassiussiinnarsinnaanngilaq, korti nutaannginneq aningaaserivimmi atorneerukkaluarpalluunniit. Kortimi nutaaq atulersinnagu atuisartup akuereqqaartussaavaa.

- Korti nutaaq allamut atugassiaasinnaavoq, allanik piumasaqaatitaqarsinnaavoq, allatut akeqarsinnaavoq, atuisartunut sullissineq allaasinnaavoq, aamma akinut akiliutinullu allatut ilioriaaseqarsinnaalluni. Atuisartup tamakku nalunngeqqaartariaqarpai, namminerlu toqqassavaa korti suna atorusunnerlugu, atuisartut ombudsmandiat nassuiaavoq.

Bankilli akiliutinik ajunnginnerusunut taarsiisimanerarput:

- Piumasaqaatilli, MasterCardimut nutaamut atatillugu atuuttut, Visa Electronip piumasaqaataanut assingupput. MasterCardili nutaaq chipitaqarpoq, Visa Electronimut sanilliullugu isumannaannerulluni, Peter Petersen oqarpoq nangillunilu:

- Taamaattumik allatut iliuuseqarnianngilagut, atuisartulli ombudsmandiata erseqqissaassutai tusaatissatut tiguinnassallutigik, Grønlandsbankenip atuisartunut pisortaa oqarpoq.