Grønlandsbanki Danmarkimi atuisussarsiorniarpoq

Kalaallit Nunaanni aningaaseriviit annersaat Grønlandsbanki Danmarkimi aningaaserivinniituutitaqartunut neqerooruteqarpoq.
Allattoq Jaaku Lyberth
novembarip 06-at 2009 06:03

Grønlandsbankimut aningaasanik toqqorsinermi erniat 3,75 procentinik annertussuseqartut neqeroorutigineqarput, aviisi Sermitsiaq taamatut allaaserisaqarpoq.

Inuit nalinginnaasumik aningaaserivinnik atuisartut annerusumik saaffigineqarput, aammalu suliffeqarfiit neqeroorfigineqarlutik. Aningaasat 100.000 koruunit 5 millioni koruunillu akornannik amerlassuseqartut aningaaserivimmut Grønlandsbankimut ikigaanni 3,75 procentit tikillugit ernialerneqarsinnaapput.

Kalaallit Nunaanni najugaqartut Danmarkimi aningaaserivinnik atuisut pilerisaarniarpavut, taamatullu Danmarkimi aningaaserivinni atuisut pisisartoriniarpagut, aningaaserivimmi Grønlandsbankimi namminersortunut sullissisartut pisortaat Peter Petersen oqarpoq.

Grønlandsbankip neqerooruteqarnera decemberip ulluisa 15-iata tungaanut neqeroorutaavoq. Grønlandsbanken inunnut 60.000-inut sullissivoq taakkunannga 1.000-it missaanniittut Danmarkimi najugaqarlutik.