Grønlandsbanken ukiup affaanut angusarissaarpoq

Akileraarutinik akiliinissaq sioqqullugu sinneqartoorutit 42,5 millionit koruuniupput, taakkua nunarsuatsinni aningaasarsiornikkut ajornartorsiortoqaraluartoq, siorna ukiup affaani naatsorsuutit assigiinnarpai, tamannalu aningaaseriviup siulersuisuisa naammagisimaarpaat.

Grønlandsbankip ukiormanna erniatigut sullitaminillu akiliuteqartitsisarnermigut isertitai 4,7 procentimik qaffariarput, 122 millionit koruunit missaanniillutik.

Taamaattorli isertitat kisimik qaffariarsimanngillat, tassami aningaaseriviup aningaasartuutai nalikilliliinerilu aamma qaffariarsimammata. Taakkua 13 millionit koruuninik amerleriarsimapput. Tamatumunngali nassuiaatigineqarluni aningaaseriviup, aningaaserivinnut ikiorsiissutissanik aaqqissuussinermut peqataanera, tamatuma peqatigisaanik sulisunut aningaasartuuteqarnerulernera aamma aningaaseriviup Nuummi qullersaqarfissaata sanaartorneranut aningaasartuutit amerleriarnerat.

Aningaaseriviup atukkiussai 2,7 milliardit koruuninut amerleriarput, ileqqaakkallu 3,5 milliardit koruuninut amerleriarlutik. Taamaalilluni aningaaseriviup akiliisinnaassuseqarnissaminut inatsisitigut pisussaaffini 200 procentingajammik matussutissaqartilerpai.

Grønlandsbankip 110-nik sulisoqartup ukiup naaneranut naatsorsuutimigut siornartut angusaqarnissani naatsorsuutigaa.