GrønlandsBanken sinneqartoorpoq

Aningaaseriviup GrønlandsBankenip ukiup qaammataani siullerni sisamani sinneqartoorutai akileraarutit ilanngaatigereerlugit 32 millionit koruuniupput. Tassa sinneqartoorutit siornamut naleqqiullugit marloriaataallutik. Grønlandsbanken tusagassiuutinut taama nalunaaruteqarpoq.
apriilip 26-at 2012 08:01

Atukkiinerit amerlanerusut, aningaaseriviit akiliisinnaajunnaannginnerat, pappialallu nalillit iluanaarutaasimaneri sinneqartoornermut pissutaatinneqarput.

- Ukiup aallartinnera naammagisimaarparput. Aningaaserivimmi ulapaartoqarpoq, aningaaserivinnullu akiliisinnaajunnaartunut siornatut akiliinngilagut, Amagerbankenimmi siorna akiliisinnaajunnarnera akisunaaratsigu, aningaaseriviup pisortaa, Martin Kviesgaard oqarpoq.

- Sullitavut naammaginartumik amerleriarput sinneqartoorutittalu amerleriarnerinut tamanna nassuiaatissaavoq. Tamatumalu peqatigisaanik takusinnaasatsitut sullitavut ingerlalluarput, taamaattumillu atukkiinitsinni annaasavut ikittuinnaallutik, aningaaseriviup pisortaa oqarpoq.

Erniat ukiormanna appasikkaluartut Grønlandsbankip ukiumit qaangiuttumit ikinnerusunik atukkiinissani naatsorsuutigaa.

- Naak aningaaseriviup ukioq isumalluarfigigaluaraa, inuussutissarsiornikkut nutaanik aallartitsisoqarnissaa neriuutigaarput, aningaaseriviup pisortaa, Martin Kviesgaard, naggasiivoq.