Grønlandsbanken rekordileeqqilerpoq
Tamanna aningaaseriviup nammineq, aamma taamaassagami, naammagisimaaqaa, sullissaminut aamma iluaqutaassasoq unnerlugu.
Naatsorsuutit pillugit nalunaarummini GrønlandsBanken-imi pisortaq, Martin Kviesgaard, allappoq, naatsorsuutit taama kusanartigisumik inerneqarnerat - aningaaserivimmi aktiaatiliutilinnuinnaanngitsoq - aammali sullitaminnut - iluaqutaassaqisoq.
Inuit aningaaserivimmik atuisut akeqanngitsumik netbankitaartinnissaat, akiliutinik assigiinngitsunik atuisut akiliumminnik atuigaangamik akitsuutaasa appartinneqarnissaat, avatangiisinullu mingutsitsinngitsunik biilitaarniartunut iluanaarutaasinnaasumik immikkut taarsigassarsisitsisalernissaq Martin Kviesgaardip maanna anguniarnialerpaa. Inuussutissarsiornermut aningaasaliiniartunut nutaanik aaqqissuussisalernissaq tapersersussallugu aningaaseriviup aamma piareersimaffigaa.
- Aalisarnermik inuussutissarsiutilinnut, inissialiortiternerit annertusarneqarnissaannut suliffeqarfiinnullu aatsitassarsiornermi peqataaniartunut inissaqartitsilluarpugut, aningaaserivimmi pisortaq oqarpoq, ilutigalugulu erseqqissaatigaa inuiaqatigiit aningaasarsiornerisa annertusarneqarnissaat qanoq pingaaruteqartiginersoq.
Ukioq manna rekordiliilluni isertitaqarnermut ingerlatsilluartoqarnera aningaaseriviup nammineq pissutaanerarpaa, aningaaserivimmiititat amerliartornerat atortitallu suli taama annikitsigineri aamma pissutaanerarlugit, tamannami isumaqarpoq akiliisinnaasuseq inatsisini piumasaqaatinit marloriaammik annertunerusoq. Danmarkimi aningaaserivippassuit GrønlandsBanki usorinngitsoornavianngilaat.