GrønlandsBANKEN: Naatsorsuutit naammagisimaarpagut
Aningaasat nalingisa naleqqussannginnerini nalikilliliisoqannginneranilu angusat tassaapput 68,7 millionit koruunit, siorna piffissap taamaalinerani 70,1 millionit koruuniusimallutik. Akileraarutillu suli ilanngaatiginagit angusat siorna 78,4 millioniusut maanna 55,1 millionit koruuniupput.
- Qanoq inissisimasoqarnera eqqarsaatigalugu angusavut naammagisimaarpagut, Grønlandsbankip pisortaanera Martin Kviesgaard taama oqarpoq.
- Taarsigassarsisitsinerilli amerlinissaat kissaatigigaluarparput, taamaattoqarnerami inuiaqatigiit siuariartornerinut siunissamullu isumalluartoqarneranut ersiutaasarmat, pisortaaneq taama allappoq.
Nuummili sanaartornermik suliniutit anginerusut, soorlu parnaarussivittaassaq umiarsualivittaassarlu inuussutissarsiutinik ingerlataqartunut pitsaasumik malunnaatilimmillu sunniuteqartussaassasut naliliivoq.
Innuttaasullu aningaasanik atuinerulaalernissaat Martin Kviesgaardip aamma neriuutigaa.
Pissutsit pitsaanerusumut saakkiartortut
- Kikkut tamarmik tunuarsimaaleraangata inuiaqatigiit tamakkerlutik aamma unikaallatsinneqartarput. Pissutsilli pitsaanerusumut saakkiartorput. Nuummi inissianik niuerneq suli ingerlalluarpoq aammalu biilinik nutaanik avatangiisinik qajassuussinerusunik pisisartut amerliartorlutik. Tamakkulu inuiaqatigiinni aningaasaateqartoqarneranut ersersitsisuupput, Martin Kviesgaard taama oqarpoq.
Grønlandsbankip 2015-imut angusassatut naatsorsuutini attatiinnarpai, tassalu 125 millionit koruuninit 145 millionit koruuninut, siorna angusat 148 millionit koruuniusut.
