Grønlandsbanken itigartitsivoq

Qallunaat aningaaseriviisa ajutoornerat pissutaalluni Grønlandsbanken nutaamik periarfissinneqarpoq, Danmarkimi aningaaserivinnik piginneqataalersinnaalluni
aggustip 19-at 2011 10:38

Qallunaat aningaaseriviisa ajutoornerat pissutaalluni Grønlandsbanken nutaamik periarfissinneqarpoq, Danmarkimi aningaaserivinnik piginneqataalersinnaalluni.
Nunatsinnili sullitaqarnini Grønlandsbankenip aallukkusunneruaa, taammattumillu Danmarkimi niuffaffinnut isernissaminut neqeroorfigineqarnerminut naaggaaginnarsimalluni.
Finanswatch.dk-p nittartagaani tamanna atuarneqarsinnaavoq.

- Danmarkimi pisiortornissamik neqeroorfigineqarsimanerput nassuerutigissavara, Kalaallit Nunaannili sullitavut aallakkusunneruagut, aningaaseriviup pisortaanera Martin Kviesgaard oqarpoq, neqeroorutigineqarsimasullu suunersut itinerusumik iserfigerusunnagit.

Aatsitassarsiornermi periarfissat aningaasarsiorfigineqarsinnaanerat Grønlandsbankenip isumalluarfigai.

- Kalaallit Nunaanni aningaasarliornerup nalaaniippugut, allanngorarpallaanngilarli, aningaaserivippullu ingerlalluarluni. Aatsitassarsiornerup annertusiartuinnarnera isumalluartitsilerpoq, aatsitassanillu annertuunik piiaasoqalissagaluarpat nukissavut maani atorusunneruavut, Martin Kviesgaard finanswatch.dk-mut oqarpoq.

Kalaallit Nunaanni sullitaqarnini Grønlandsbankenip pingaartippaa, naallu qallunaanik aningaasaliisussanik ujartuigaluarlutik, maani Nunatsinni taarsigassarsitsisarnissani orniginartinnerugaa, Martin Kviesgaard oqarpoq.

Aningaaseriviit Danmarkimeersut arlallit Grønlandsbanken 1967-imi ammarpaat, Nuna Bankilu 1997-imi kattullutik. Grønlandsbanken tallimanik Nunatsinni maanna immikkoortortaqarpoq.