GrønlandsBANKEN aningaasanik tapiissuteqarpoq

Aningaaseriviup Grønlandsbankip Inuussutissarsiornermut aningaasaateqarfia suliutinut assigiinngitsorujussuarnut pingasunut tapiiniarluni aalajangerpoq.

Suliniut ”Kalaallit Nunaata kuultia – ensyminik siunissami ujaasinissaq” tassaavoq TV-liarineqartussaq, Kalaallit Nunaata Kujataani kangerlunni Ikkami napasunik ilisimatuunut misissuisunut nunarsuatsinni tamaneersunut atassuteqaataasussaq. TV-liortussat pinngortitami pisumut tassunga eqqumiitsumut oqaluttuarnissaminnut 150.000 koruuninik tapiiffigineqarput.

Suliffeqarfik Arctic Mussel Greenland, Kujataani uillunik naatitsinermik aallartitsisimasoq, 36.000 koruuninik tapiiffigineqarpoq.

Taava aamma suliffeqarfik, Piorsaavik Innovation, 15.000 koruuninik tapiffigineqarpoq, nerisassat pillugit Maniitsumi takutitsinersuarmut, marsip ulluisa 21-ani 22-iannilu ingerlanneqartumut, atugassaminik.

Inuussutissarsiornermut Aningaasaateqarfiup siunertaraa, Kalaallit Nunaanni inuiaqatigiinnut suliniutinut iluaqutaasinnaasunik sullissisunut tapiisarnissani, pingaartumik inuussutissarsiortut siuarsarneqarnissaannut, eqqarsaatinillu nutaanik aqqutissiuussinissamut.