Grønland i Tivoli ullumi naggaserneqassaaq

Rasmus Lyberth "Plænen"-imi unnugu tusarnaartitsissaaq, tusarnaartitsisoqareerpallu Grønland i Tivoli naggaserlugu erinarsoqatigiittoqassalluni.

Rasmus Lyberth Londonimeeqqammerpoq, Kensington Gardensimi Royal Albert Hallimilu tusarnaartitseqqammerami. Tulluusimaarutigeqisaminik Royal Albert Hallimi tusarnaartitsivoq:

- Misigisaq tupinnartorujussuuvoq, Rasmus Lyberth oqarpoq. Rasmus Lyberth aqqaneq-marlunnik ukioqarlunili erinarsortalerpoq, erinarsortartunngornissanilu umiartortuunermi nalaani aalajangersimallugu. Rasmus Lyberthip erinniai nunarsuaq tamakkerlugu ilisimaneqarput, nuuteerarpassuarnik saqqummersitsinikuullunilu akissarsitinneqartarsimalluni, soorlu aamma filmiliaritittarlunilu isiginnaartitsisarsimasoq. Qiperuisarnikuuvoq, taallianilu aamma saqqummersinnikuullugit. Nanook, Malu Rohmann Fleischer aamma nipilersoqatigiit Small Time Giants "Grønland i Tivoli"-mi ukioq manna aamma aliikkusersuipput.