Grækenlandimi suli ikuallannersuaqarpoq

Grækenlandimi qatserisartut ullut pingajussaanni orpippassuit ikuallattut illoqarfiit pingaarnersaannut Athenimut siaaruaatinnginnissaat ilungersuutigileruttorpaat.
Allattoq Lotte Holm
aggustip 24-at 2009 07:47

Maannamut inneq illoqarfissuup immikkoortuinut avalliunerusunut anngutereersimalerpoq, inuillu tuusintilikkaat angerlarsimaffitik qimagartariaqarsimavaat.

Ullaaq manna anori sakkukinnerulermat, qatserisartut neriuutigilerpaat, timmisartuaqqat qulimiguullillu atorlugit imermik nakkaatitsinermikkut inneq killilersinnaanerulissagitsik.

Qamisaaniarnermi qatserisartut 2000-it peqataapput, taakkualu Italiamit, Frankrigimit Cypernimillu timmisartunit qamisaaqataasunit ikiorserneqarput.

Illoqarfiit avannaatungaani sinerissamiittut Nea Makri aamma Dionysos kiisalu Marathon innermit navianartorsiortinneqarput, tamaanilu inneq nakkutigiuminaappoq, tamaani anorip saqeqattaarnera pissutigalugu.

Athenip immikkoortortaani Agios Stefanos-imi innuttaasut 20.000-it missaanniittut biilinik, motorcykelinik pisummillu qimarngussorneqarput, tassa inneq tamaanga qanivallaartutut nalilerneqarmat. Agios Stefanos Athenimit 23 kilometerinik avannarpasinnersumiippoq.

Orpipassuit ikuallattut Athenip qiterpasissuanit takuneqarsinnaapput, ikuallannerlu 2007-imi ikuallattoqarneranit annertunerusoq oqaatigineqarpoq.