Grækenlandimi ikuallannermi inuit 63-it ajunaarput

Grækenlandimi oqartussaasut maannakkut misissuipput orpippassuarnik ikuallatsitsisimanerit pikitsitsinianit ikuallatsinneqarsimanersut !

Misissuinissarlu pillugu politiit annertunerusumik oqartussaaffilerniarneqarput, ikuallatsitsisimasunik ujaasinissamut atatillugu:

Sapaatip akunnerata naanerani inuit 63-it orpippassuit nunallu ikuallatsinneqarsimanerisigut ajunaarput.

Ikuallannersuillu suli taqilisinneqanngillat.

Ullup unnuallu ingerlanerinnaani ikuallatsitsinerit nutaat 89-it pilersinneqarsimapput.

Inuit ikuallaffiusuni najugaqartut Grækenlandimi naalakkersuisut pisuutippaat, ikuallattorpassuit qatserniarneqarnissaannut sukkanerusumik iliuuseqarniannginnerarlugit.

Naalagaaffiullu unnerluussisuata maannakkut sulissutigilerpaa,

Orpippassuarnik ikuallatsitsinerit pikitsitsinianit ikuallatsinneqarsimanersut maannakkut piaartumik misissorneqassasoq.

Ikuallatsitsinerillu pikitsitsinianit ikuallatsinneqarsimasutut nalilerneqarsinnaappata,

taava Grænkenlandimi politiit misissueqqissaarnermut atatillugu pikitsitsinianik akiuiniarnermut inatsit atorsinnaalissagaluarpaat, inuit kikkulluunniit ikuallatsitsisimasutut pasineqartut tigusariortorneqarnissaannut.

Maannakkuugallartoq inuit 32-it ikuallatsitsisimasutut pasineqarlutik tigusarineqarsimapput.

Grænkenlandimi naalakkersuisut siulittaasuat, Costas Karamanlis, oqarpoq; Ikuallannerit taama amerlatsigisut naalaatsornerinnakkut pisimajunnanngitsut.

Grænkenlandimilu politeeqarnermut ministerip oqaatigaa; pilersaarusiorluakkamik ikuallatsitsinerit pikitsitsinianit ingerlanneqarsimasinnaasut, pissutsigalugu naalakkersuisut maanaannakkut qinersisitsinissamik nalunaaruteqarsimammata.

Grækenlandimi pinngortitaq pillugu nunarsuaq tamakkerlugu suliniaqatigiiffimmeersoq BBC-mut oqarpoq, ikuallatsitsinerit nunamik atuinissamut tunngatillugu sanaartorusuttunit pilersinneqarsimasinnaasut. Grækenlandimi inatsit tunngavigalugu inerteqqutaavoq, orpippassuaqarfinni sanaartornissaq. Orpippassuaqarfiillu ikuallassimappata kingusinnerusukkut sanaartorfigineqarsinnaalernissaat oqartussaasunit akuersissutigineqarsinnaalissaaq imaluunniit nunaatitut naggorisarneqarsinnaalissallutik.

Ikuallaffiusuni borgmesterit arlaqartut oqarput, sanaartortsisartut orpippassuaqarfinni sanaartorusuinnarlutik taamatut kusanaatsunik pissusilersornermikkut orpippassuarnik ikuallatsitsisaqattaartut.