Grimsvötn innermik anitsiunnaarpoq
Islandimi qaqqaq innermik anitsisartoq Grimsvötn anitsiunnaarpoq, maannalu ippassaanili eqqissisimasoq, Islandimi silasiorfimmi atorfillip ujarassiuup nutaarsiassaqartitsivimmut AFP-mut oqaatigaa.
- Atortorissaarutivut arfininngormat ullaakkulli malussarput. Taamaalilluta anitsinera unittutut oqaatigisinnaalerparput, Steinunn Jakobsdottir oqarpoq.
Innermik anitsinera maajip 21-anni aallartippoq, anillaatsitaalu silaannarmut 20 kilometerinik qutsitsigisumiilertarlutik. Tamanna innermik anitsisup timmisartuussinermut siorna akornusersuineratut pisinnaanera ernummatigineqaleraluarpoq.
Grimsvötn Islandimi qaqqani innermik anitsisartuni anitsikulanerpaasoq, maajip 21-anni innermik anitsilluni aallartittoq, qaqqat innermik anitsisut 1873-ip kingornagut sakkortunersaraat. Qaqqap innermik siorna anitsisup, Eyjafjallajökullip, anitsineranit quleriaammik sakkortuneruvoq.
Piffissami sivikitsuinnarmi Islandip kujasissortaa 5.000 kvadratkilometeriusoq arsakunik 1 centimeterip 5 centimeterillu akornanni issussusilimmik qallerneqarpoq.