Grevinde Alexandra Røde Kors Børnehjemmimut pulaarpoq

Røde Kors Børnehjemmemi meeqqat najugallit sulisullu pulaartissamik tikiunnissaannut pissangallutik utaqqipput. Aarimmi utaqqinerat sivitsunngitsoq pulaartussaat tikiuppoq.

Grevinde Alexandra tikiummat, meeqqat ittuukujullutik tikilluaqqusipput. Grevindillu niviarsiaqqamit arfinilinnik ukiulimmit naasunik tunineqarami nuannaajallaatigaa oqarluni:

- Sunaaffa Kalaallit Nunaanni naasunik uummaarissunik tunisissallunga, Grevinde Alexandra qungujulalluni oqarpoq.

Nukappiararlu, Qisunnguaq, nujarissarluarsimasoq maluginiarpaa nujai kusanarnerarlugit.

Qisunnguaq Grevinde Alexandramik pulaartoqarnissaminnut piareersarluarsimavoq. Nujarissarsimavormi aammalu kutaarsinissaminut ilinniarsimalluni. Meeraqatai aamma ullaaq piareersarsimapput kusanartunik atisalersorlutik kutaarsinissaminnullu aamma ilinniarsimallutik.

Røde Kors Børnehjemmimi atorfillip, Ruth Svendsenip qiimmallaataasarnerarpaa aaliangersimasumik anguniagaqartunik pulaartoqartarnertik:

- Grevinde Alexandrap suliniutaa Nunarsuatsinni meerarpassuarnut pingaarutilerujussuuvoq. Taamaammattumik meerartatta peqatigiserineqarnerat nuannersumik tiguarput, Ruth Svendsen oqarpoq.

Namminersorlutik oqartussat UNICEF-illu suleqatigiinnissamik isumaqatigiissusiornissaanut atatillugu Grevinde Alexandra Røde Kors Børnehjemmimut pulaarpoq.