GreenSat eqqarsarnartoqartinneqarpoq

Narsaminngaanniit tv-kkut isiginnaartartunut kanalinik siammarterisup GreenSat-ip unnulaaginnaraalu atoqatigiittunik pornonik kanalit ilaanni isiginnaagassiisarnera, nunatsinni radioqarnermut tv-qarnermullu ataatsimiitaliap eqqarsarnartoqartippaa.

GreenSatip pisortaata Edvard Bach-ip tamanna paasisinnaalluarnerarpaa, meeqqalli pornomik takusaqarsinnaannginnerarpai, dekoderi angajoqqaanit parnaarneqarsinnaammat.

- Nunatsinni radioqarnermut tv-qarnermullu ataatsimiititaliap oqariartuutaa paasisinnaalluarpara, oqaatigiinnassavarali dekoderit angajoqqaanit parnaarneqarsinnaammata, Edvard Bach oqarpoq, nangillunilu:

- Dekoderimik pisisoqaraangat pisisoq inersimasuusarpoq, taassumalu nammineq aalajangersinnaavaa dekoderi parnaarneqarsinnaassanersoq parnaarneqarsinnaassannginnersorluunniit. Inuit angerlarsimaffimmini suut isiginnaartassaneraat aalajangissanngilarput. Uagut tamanna akisussaaffiginngilarput, Edvard Bach erseqqissaavoq.

GreenSat-ip kanalinik siammarterinermini nunatta nalunaaqqutaanut naleqqussaasariaqartoq nunatsinni radioqarnermut tv-qarnermullu ataatsimiitaliap piumasaraa, tamannali ajornassasoq Edvard Bach-ip oqaatigaa:

- Nunatta nalunaaqqutaanut naleqqussaasinnaanngilagut. Teknikkikkut tamanna ajornarluinnarpoq, aamma akisuallaassaqaaq, Edvard Bach oqarpoq.

Dekoderimik pisinermi aallakaatitassiat suunerinik ilisimatitsisoqartarmat, unnulaaginnartorlu atoqatigiittunik pornonik aallakaatitsisarnertik Edvard

Bach-ip ajornaquteqannginnerarpaa.