Greenpeacermiut Rusland qimassinnaanngorpaat

Pillaatissaraluamillu isumakkeerfiginnittoqarnera Greenpeacep Danmarkimi immikkoortortaqarfiani eqqissiallaatigineqaqaaq, peqatigisaanilli aamma eqqaasitsissutigineqarpoq ilungersuutigisamik ingerlatsisut angerlaqqusaaleraluartut Issittumi uuliasiorluni qillerinerit nalorninartut ajornartorsiutaajuarsinnartut.

- Taamaammat akerliunerput takutillugu ilungersuuteqarnerput ingerlatiinnassavarput, avatangiisinik illersuiniaqatigiiffiup oqaaseqartartua Jon Burgwald oqarpoq, peqatigisaanillu aamma Norge, USA, Kalaallit Nunaat Danmarkilu Issittumi uuliasiornermut akuunerat pillugu isornartorsiorlugit.

- Silap pissusiisa ajornartorsiutaanerat nunarsuarmioqatigiittut ajornartorsiutitta immaqa annersaraat, taamaammat aamma paasisariaqalerparput sumiiffinni allani uuliasiorneq ingerlatiinnassagutsigu silap pissusiisa allanngoriartornerinik aaqqiissuteqarniarluta ilungersuuteqarnitsinni ajorsassalluta, Jon Burgwald Politikenimut oqarpoq.

Ruslandimi pisut sakkortuut avatangiisinik illersuiniaqatigiiffiup uuliasiorluni qillerinernut akerliussutsimik takutitsisarneranut kingunerlutsitsissanersoq Jon Burgwaldip oqaaseqarfigerusunngilaa.

- Ilavut angerlarteqqaalaariarlugit pisoq nalilersuiffigissavarput, Jon Burgwald oqarpoq. Taanna aamma isumaqarpoq Rusland umiarsuarmik ilungersuutigisamillu ingerlatsisunik tigummigallagassanngortitsinermigut nunat tamalaat Ruslandillu nammineq inatsisaannik unioqqutitsisoq.

- Naalagaaffiit maleruagassanik nalinginnaalluinnartunik malitaqarsinnaannginnerat inupiluttullu pissusilersornerat suliniaqatigiiffimmut akerliussutsimik takutitsinermik sakkugisaqartumut, Jon Burgwald oqarpoq, peqatigisaanillu naqissuserlugu Greenpeacep tamanna uniffigiinnarnavianngikkaa.

- Suliniutitsinnik ajornarnerulersitsigartoq suliniutitta pingaaruteqassusaanik millisitsinavianngilaq, Politikenimut oqarpoq.