Greenpeacermiut qillerivimmut allamut qallorput
Uuliamik qillerivik Greenpeacermiut qaqiffigisaat pilersaarutit malillugit immami itisuumi 500 meterisut ititigisumi uuliasiorluni qillerinissaraluaminut ingerlariaqqissinnaajunnaarallarpoq.
Greenpeacermiut tusagassiuutinut nalunaarumminni allapput, Greenpeacermiut marluk, Victor Rask aamma Anais Schneider, umiarsuup kisarsuata kalunneratigut qallorsimasut, maannalu toqqup annoraamerngani immamit 5 meterisut qutsitsigisumi nivinngaartut.
- Uuliasiortunik persarinninnerput pissuteqarpoq pinngortitami mianerisassami ajoquseerujussuarsinnaaneranut akerliunerput takutikkusukkatsigu, Greenpeacemi sila pillugu oqaaseqartartoq Jon Burgwald oqarpoq, nangillunilu:
- Kalaallit Nunaanni qillerinerit pinngortitamut ajoquseerujussuarsinnaasut qimakkatsigit kujammut ingerlaqqippugut, siunniussarpullu ullumi anguarput. Qillerinerit amerlanngitsut taamaallaat unikaallatsissinnaavagut. Maannakkut piffissanngorpoq politikerit akisussaasut qanoq iliuuseqarnissaat. Nunarsuarput imaalu uuliamut akissaaruppoq, Jon Burgwald ilaatigut taama allappoq.
Greenpeacermiut uuliasiortunut Shetlandip qeqertaani akerliuniarnerat Kalaallit Nunaanni Cairn Energyp qillerivianut qaammatip siuliani akerliuniarluni ulluni marlunni qillerinermik unitsitsinermut ilaavoq.