Greenpeacermiut piaartumik tigusarineqarput
Taamaattorli avatangiisinik illersuiniaqatigiit aallaqqaammut ulluni unnuanilu sisamani qillerivimmiikkaluarlutik, ullaarmanna nalunaaquttap akunnera ataaseq sinnilaaginnarlugu qillerivimmiipput.
- Greenpeacep sillimanissamut killiliussamik qaangiisimanera pillugu, ullaaq arfineq- marlunngulersoq saaffigineqarpugut. Tamanna tunngavigalugu naliliivugut, piaartumik tigusarinninnissamik periarfissaqarluta, arfineq-pingasullu qaangilaaraa tigusarinnippugut. Politimesterip tulliata Morten Nielsen taama oqarpoq, qanorli iliorlutik tigusarinnissimanertik oqaluttuarerusunnagu.
Greenpeacermiut 20-t anisitaareersullu Greenpeacermiunik allanik qillerivimmut qallortoqaqqinnera, Morten Nielsenip tupigusuutigaa.
- Tamatumunnga piffissaajaateqaqqinnginnissarput, neriuutigisimagaluarpara. Kisianni neriuutivut ilaannikkut piviusunngunngitsoortarput. Sillimanissarpulli piareersimaffigiuarparput, Morten Nielsen oqarpoq.
Kisianni Greenpeacep maannamut pingasoriarluni iliuuseqarneri Politiinut qanoq piffissaajaataatigisimappat?
- Nalunaaquttap akunneri politiillu qassit atorsimanerivut kisitsisaatiginngilakka. Uatsinnulli sunniutaat tassaapput sulisutta politiitut suliassaraluatik tunulliullugit Greenpeacemut tunngasunik suliaqartariaqarsimammata, Morten Nielsen naggasiivoq.