Greenpeacep umiarsuaata sumukarnera isertuussaavoq
Avatangiisinik illersuiniaqatigiiffiup uppernarsarpaa, umiarsuup angalanerata siunertarigaa, kikkunnut tamanut takussutissiiniarlutik, uuliasiornermi suliffeqarfissuutillit piffinni navialineqarsinnaasuni sulimmata. Umiarsuulli sumunnarneranik Greenpeace oqarumannani.
Savalimmiormiut nittartakkakkut nutaarsiassaqartitsiviata, Vagaportalurin-ip webcam atorlugu umiarsuaq malinnaavigaat, taakkulu isumaqarput umiarsuaq maanna Islandip imartaaniittoq Kalaallit Nunaata tungaanukarluni.
- Nutaarsiassaqartitsivinnit arlalinnit paasivarput Greenpeace-p umiarsuaa Kalaallit Nunaata tungaanukarunartoq, Kalaallit Nunaanni vicepolitimester Morten Nielsen KNR-imut oqarpoq.
Qeqertarsuup avataani Cairn Energyp misiliilluni qillerinerinut Greenpeace akerliujuarsimavoq.
Avatangiisinik illersuiniaqatigiiffiup Danmarkimi immikkoortortaata nittartagaani atuarneqarsinnaavoq qulequtaq allassimasoq: "Nunani issittuni uuliasiorneq unitsilli".
Kalaallit Nunaata imartaani avatangiisinik illersuiniaqatigiiffik qanoq iliuuseqassagaluarpat politiit qanoq iliuuseqarnissaat, Morten Nielsenip akerusunngilaa:
- Qanoq iliuuseqarnissarput kikkunnut tamanut tusarliussinnaanngilara, Morten Nielsen oqarpoq.
Qanittukkut Savalimmiuni politiit danskit politiivinut ikoqqullutik nalunaarput. KNR-ip paasisai naapertorlugit, sakkutuut Danmarkimeersut maanna alapernaarsuummi Triton-imiipput, Savalimmiullu kujataani uuliasiorfiit eqqaanniilutik.