Greenpeacep umiarsuaa Esperanza Nunatta kujataanut pivoq
Umiarsuup sumut killinnera ippassaq unnukkut seqernup tarrinnerani avannarpasissutsimi 59 gradimi kippasissutsimilu 45 gradimiinnerarpaat, taannalu Nanortallip kujataaniippoq.
Taamatullu nalunaaruteqarnerat Kangilinnguani sakkutooqarfiup ullaarmanna uppernarsarpaa.
Jan Bøgstedip Kangilinnguani sakkutooqarfimmeersup ilisimatitsissutigaa, Esperanzap Nunatta imartaaniinnini sumunnarnertillu Kangilinnguani sakkutooqarfimmut nalunaarutigigaa.
Taamaattorli Jan Bøgstedip umiarsuup sumerpiaq inissisimanera sumunnarneralu ilisimatitsissutigisinnaanngilai, tassami paasissutissat taamaattut isertuussaasarmata.
Esperanzap orninniagaa tassaasinnaavoq Nuuk, tassami Greenpeace uuliasiorneq pillugu aqagu unnukkut ataatsimiigiaqqusimmat, ilaatigut Mexicop Kangerliumanersuani uuliasiornermi ajutoornermi takunnissimasumit oqaluttuussisoqassalluni.
Tamatuma kingornagut Greenpeace Nordenimi pisortap Mads Flarup Christensenip Cairn Energyp Nunatta imartaani uuliamik ujaasilluni qillerineranut Greenpeacep sooq
akerliunera nassuiassavaa.