Greenpeacep siunertartik oqaatigerusunngilaa
Umiarsuaq sikunik aserorterut Greenpeacemit pigineqartoq, Arctic Sunrise - Issittumi seqerngup nuinera - Kalaallit Nunaata imartaanut ullumi pivoq.
Sila pillugu Greenpeace-imi sulisoq, Jon Burgwald, ualigaa tallima-qeqqata missaani attavigaarput, taanna sapaatip-akunnerani kingullermi Aasianniippoq, maannali Tysklandimiilluni - tassa umiarsuarmi nunatsinniittumiinnani:
- Cairn Energyp uuliamik misileraalluni qillerineri alaatsinaanniarlugit umiarsuaq kalaallit Nunaata imartaaniippoq. USA Canadalu qillerinissat isumannaatsuunnginnerarlugit qillereqqusinngimmata, Cairn Energy kisimi Issittumi qillerivoq. Taamaammat Cairn Energyp ulorianaqisumik mingutsitseqisumillu qillerineri alaatsinaattariaqarpavut, Jon Burgwald oqarpoq.
Avatangiisit pillugit suliniaqatigiiffimmiit iliuuseqartoqarnissaa taava ilimagisinnaassanerlutigu - soorlu siorna taama pisoqartoq, tassami Cairn Energyp umiarsuaq qilleriviutaa qallorfigineqarpoq, qallortullu ullut arlerlugit tamaaniipput?
- Iliuuseqassanerluta siusinaarluta soorunami oqaatigisinnaanngilarput, Jon Burgwald suleqatitsinnut Rune Langhoffimut oqarpoq.
Sikunik aserorterutip Arctic Sunrisep angalanera internetikkut nalunaaquttap akunnerini kingullerni malinnaavigineqarsinnaavoq, assiliissummillu webcamimik umiarsuarmiittoqarmat Cairn Energyp umiarsuaataasa qilleriviit ilaat ungasianiit takuneqarsinnaasimavoq.
Arctic Sunrise umiarsuarlu qillerivik qanimut imminnut attaveqarsimanersut suli ilisimaneqanngilaq.
Arctic Sunrise - siornatigut Polarbjørnimik taaguuteqarsimasoq - 1975-imi sanaajuvoq, meterinik 50-inik takissuseqarpoq, 1.000 tonsingajannik oqimaassuseqarluni - qulimiguulimmullu ataatsimik mittarfeqarpoq. Greenpeace-imit 1995-imiilli pigineqalerpoq.
Arctic Sunrise-ip angalanera nittartakkatsinni knr.gl-imi malinnaavigineqarsinnaavoq.
