Greenpeacep Katuami ataatsimiititsinera sioqqullugu eqqissisimaffiuvoq

Avatangiisinut illersuiniaqatigiiffik Greenpeace Katuami oqallinnissamut qaaqqusivoq.

Qeqertarsuup avataani misiliilluni qillerisoqarnissaa Greenpeacep akerleriuarsimavaa, Misiliilluni Issittumi qillerisoqarnissaa illersorneqarsinnaanngitsoq, Greenpeacep oqaatigaa, Mexicop kangerliumarngani uuliamik maqisoornermut pissutaasinnaasut ilisimaneqannginneri ilaatigut taakkartorlugit.

Inuit arlallit nittartakkami Facebookimi eqimattat Nuummiunik kajumissaaripput ataatsimiinnissamut peqataaqqunagit.

Eqimattat taakku oqaatigaatigaat Greenpeace Kalaallit Nunaannik malersuisoq.

Katuami unnuup ingerlanerani makku tusarneqarsinnaassapput:

Immap uumasuinik ilisimasallip nammineq takusimasani oqaluttuarissavai.

Immap uumasuinik ilisimalik taanna juulimi Mexicop kangerliumarnganiippoq, USA-p ilaani Louisianamiikkami. Mexicop kangerliumarngani imartaq uuliamik maqisoornermik eqqugaavoq, Louisianallu sineriaa aamma eqqugaalluni.

Cairn Energyp misiliilluni Qeqertarsuup avataani qillerinnginnissaa pillugu tunngavilersuutit, Greenpeacep generalsekretæriata, tassa qullersaata, Mads Flarup Christensenip kingorna saqqummiutisssavai.

Greenpeace Katuami nalunaaqutaq arfineq marlunut ataatsimiititsivoq. Taanna sioqqullugu Katuami silataanilu eqqissisimasumik pisoqarfiuvoq, akerliussutsimillu takutitsiniarlutik nalunaaruteqartut takkussimanngitsut, radioaviisimi suleqaterput, Mads Lynge Katuamit nalunaarpoq. Ataatsimiinneq sioqqullugu politiit marluk Katuap iluaniipput, tallimat arfinillillu missaannik ámerlassusillit Katuap silataaniipput.

Taamaalereerpat ammasumik oqallittoqassaaq, apeqquteqarusuttullu sassarsinnaassallutik.