Greenpeacemut tapersiisut ajutoortoqarnissaa ernumagaat
Greenpeace aamma Aatsitassanut ikummatissanullu pisortaqarfik naapertorlugit Nunatsinni ukioq manna uuliasiorluni qillerinerni akuutissat aappaluttunik taagorneqartut 45 tonsit aniatinneqassapput. Norge uuliasiornermini tamani ukiumut 32 tonsinik aniatitsisarpoq, Danmarki 1,6 tonsimik aniatitsisartoq. Tamannalu Aqqaluaq Geislerip ernumanartoqartippaa, taanna suliffeqarfiutimini akuulissanik assigiinngitsunik ullormut suliaqartarpoq.
- Kemikaliat atorneqartussat avatangiisinut qanoq kinguneqarsinnaaneri paasisariaqarpavut. Aalisarneq illersorniarutsigu kemikaliat ulorianaateqarsinnaanersut paaseqqaartariaqarparput. Taamaattumik Greenpeacermiut taperserpakka, qillerivinnut ikisaqattaarnerat kusanaakkaluartoq, Aqqaluaq Geisler oqarpoq.
Ajutoortoqarnerani aalisarnerup eqqornerlunneqarsinnaanera taassuma ernumanartoqartippaa.
- Aningaasat isiginiaannaraluarutsigit nunarput ajoquserujussuassavarput, qilleriniarlutillu itisuumi, aamma avannamut akianullu sarfartartorsuuvoq, suna tamaat sequmissinnaavarput aalisakkallu nunanit allanit nakerineerutsillugit, Aqqaluaq Geisler oqarpoq.
Taanna kisimi ernumanngilaq, aalisartoq piniartorlu Lars Mathæussen aamma ernumavoq.
- Uuliamik maqisoorsinnaaneq annilaanngatigivara, tassami sikut akorngini uulia aniasoq kialluunniit katersorsinnaanngikkaa Norgemi uuliasiortut KNAPK-mit 2009-mi ataatsimeeqatigigatsigit uppernarsivara, Lars Mathæussen oqarpoq.
Cairn Energy, sumiiffinni assigiinngitsuni arfineq-marlunni qillerinissaminik akuersissuteqarpoq, ukiormanna sumiiffinni sisamani, tassa Lady Franklinimi, Atammiup avataani, Eqquani aamma Napariami qillerinissaminut pilersaaruteqarpoq.
