Greenpeacemi ilaasortat akiligassinneqarput Nunatsinnillu anisitaallutik

Eqqartuussinermi akerleriissutaaneruvoq inuusuttut eqqartuunneqartut ataasinngorpat aallanissaasa tungaanut politiinit tigummisaassanersut imaluunniit ullumikkut iperagaassanersut.

Hannah McCarthy aamma Luke Jones, qillerutip Leiv Eirikssonip qillerivittaata ataani ulluni sisamani annanniummi pullartaasami issimallutik nivigapput, tamannalu eqqartuunneqarnerminni miserratiginngilaat, taamaatumillu qassiiliuutaanngitsumik akueralugu Nunatsinnut ukiumi ataatsimi tikeeqqusaajunnaarnertik, 20.000 koruuninik akiliisussanngortitaanertik aammalu akueraat qilleriviup eqqaa kaajallugu 500 meterit angullugu tikeqqusaanngitsumiissimanertik.

Eqqartuussivimmi assortuussutaaneruvoq eqqartuunneqartut maanna iperagaassanersut imaluunniit ataasinngorpat aallarnissaasa tungaanut taakku politiinit tigummineqaannassanersut.

Tamassuma assortuussutaanerani politiit piumasartik pivaat:

- Danmarkimi Nunat allamiut aqutsisoqarfiannut aalajangersakkamik pissarsinitsinni paasivarput eqqartuunneqartussat Nunatsinnit anisissinnaagigut. Eqqartuunneqartullu anisitaanissamik tungaannut politiinit tigummineqaannarnissaat eqqartuussivimmit ilalerneqartoq soorunami nuannaarutigaarput, unnerluussisoq Finn Jeppesen taam oqarpoq.

Taamatullu aalajangiineq illersuisumit, Finn Meinelimit isumaqatigineqanngilaq.

- Oqartariaqarpunga neriuutigisimagaluarakku tunngavilersuutigut tunngavigalugit aallarnissaasa tungaannut iperagaanissaat, piumasarigaluarpapullu iperagaaneranni politiinullu nalunaartussaatitaassasut, uangalu isumaqarpunga taamaatut pineqaatissinneqarsimasariaqaraluartut, Finn Meinel oqarpoq.

Tassalu politiinit tigummisaaginnarnissat pissutaalluni eqqartuunneqartut aalajangerput Nunatta Eqqartuussiviannut suliassaq ingerlatitseqqinneqassasoq.

Illersuisoq Finn Meinel isumaqarpoq Nunattat Eqqartuussiviata maanna aalajangigaq allanngortissinnaagaa:

Unnerluussisorli allatut isumaqarpoq:

- Maanna oqaaseqarfigisinnaanngikkaluarlugu neriuutigiinnassavara maanna eqqartuussiviup aalajangigaa atuutsiinnassagaat, Finn Jeppesen oqarpoq.

Qeqertarsuup avataani siorna qillerinerni Greenpeace akerliunerminik takutitsimmat qillerivimmi nivigasut aamma politiinit tigusarineqarnermi kingorna Nunatsinnit anisitassanngorlugit pillaatisitinneqarput, tassalu Nuup Eqqartuussiviani pillaatigitinneqartoq Aasiaat Eqqartuussiviata pillaatisiaata asserluinnaralugu.

Eqqartuussineq ullumi nalunaaqutaq ataatsimut aallartinngilaattaani Radioaviisimit eqqartuunneqartussat oqaloqatigillatsiaratsigit taakku oqarput nuannaarutigalugu aatsaat taama sivisutigisumik qillerivimmi assersuisoqarmat. Luke aamma Hannah nalunaaquttap akunnerini 90-ini annanniummi pullartaasami issimareernerminni qasoqqasupilussuupput.

Eqqartuussinerup nalaani Greenpeace Danmark malinnaasussanik marlunnik  ikisinneqarsimapput.