VIDEO Greenpeacemeersut qillerivik Issittup imartaanukartoq ikiffigigaat
Issittumi uuliasiornissamut suliffeqarfiup pilersaaruteqaqqilerneranut eqqissisimasumik akerliunissaq iliuuseqarnikkut anguniagaavoq.
Isummaminnik nittarsaassisut Greenpeacep umiarsuaanit Esperanzamit gummibådimik ikaarput, Polar Pionerillu qaavata ataanut inissillutik.
Ullorpassuarni tassani uninnganissaminnut nerisassaqarput, soorluttaaq nunarsuarmut tamarmut attaveqarnissamut Greenpeacep issittumik illersuiniarneranut suliniuteqarnertik pillugu saqqummiussinissamut atortorissaarutit pigigaat.
Greenpeacep umiarsuaa sapaatit akunnerini sisamani kingullerni Polar Pioneerip eqqaaniissimavoq, taamaaliornermikkullu Shellip issittumi uulisiornissamut pilersaarutaanik oqallitsitsinissaq angunianeqarluni. Sapaatimmi akunnerata siuliani USA-p nunamut namminermut ministereqarfia, Shellip Alaskap avannaata imartaani issittumi qillerisinnaanissaanut akuersivoq.
Shellip qillerutaata Polar Pioneerip saniatigut Noble Discoverer aasamut Alaskamut uuliamik qilleriartussamaarpoq.
Umiarsuaq nunarsuarmi nutaannginnerpaanut ilaavoq, siornatigullu issittup imartaani Det Arktiske Oceanimi shellip qillerinerani arlaleriarlutik inatsisinik unioqqutitsisarsimallutik.
- Shellip akisussaassuseqanngitsumik qillerinerinut akiuuttuassaagut, Greenpeacemi issittoq pillugu akisussaasuusoq Jon Burgwald oqarpoq.
Greenpeacemiut arfinillit qillerivimmut qaqinerat uani takusinnaavat:
