Greenpeacekkut nunatsinnut akerliujartoriaannaapput

(Nutartigaq nal. 14:08)

Greenpeace Skotlandip Savalimmiullu akornanni uuliasiortunut akornusersuiartorsoralugu Savalimmiormiut Danskit sakkutuuinut ikioqqullutik saaffiginnipput.

Savalimmiuni internettikkut aviisip "Vagaportalurin"-ip malinnaanera naapertorlugu Esperanza maanna Islandip imartaaniilereersoq oqaatigineqarpoq. Immaqa nunatsinnukarluni.

-Ilumoorpoq umiarsuarput Esperanza angalaarmat uuliasiortut navianartortitsinerpaat akeerliuffiginiarlugit. Birgitte Lesanner Greenpeacemi attaveqarnermut pisortaq oqarpoq.

Esperanza Londonimiit sisamanngormat aallarpoq uuliasiorfiit ajutoorujussuarnissamut ernumanaateqarnerpaat misissuiffiginiarlugit.

Sunarpiaq pineqarnersoq sumullu ingerlaniarnersoq oqaatigiumanngilaa.

Uuliasiortullu akerliuffiginiarlugit Esperanza angalavoq.

Cairn Energyp nunatta imartaani uuliakoortoqassagaluarpat sillimaniarneq kisimi isumagisinnaanngikkaa Greenpeace oqarpoq.

-Sillimaniarnermut pilersaarutaat, isumannaallisaanermut pilersaarutaat, mingutsitsinnginnissamut nalilersuinerminnut saqqummiussaat atuarpagut. Tusagassiutinullu neriorsuillutik oqaatigisartagaannut tulluutinngitsupilussuupput, kisianni tassa Kalaallit Nunaata nammineq tamanna soorunami akisussaaffigissavaa, Birgitte Lesanner oqarpoq.

Aperineqaramilu tassa nunatsinnukariaannaanersut akivoq.

-Aap, uuliasiortunut mingutsitsinnginnissamut tutsuiginartinngisatsinnut orniginneriaannaavagut, Birgitte Lesanner Greenpeacemi attaveqarnermut pisortaq oqarpoq.

Nunatsinni Politimesteri oqaaseqartinniaraluaratsigu ataatsimiimmat iluatsinngilarput.