Greenpeacekkormiut suli nivingaarput
Greenpeacemiit inuit marluk uuliamik piiaasoqanngilluinnarnissaanik oqariartuuteqartut, sapaatiummat ullaassakkut nalunaaqutaq sisamanut Leiv Eirikssonimiilerput, maannalu tassa akunnerit 80-it sinneqalaartuni qillerivimmiillutik.
Cairn Energyp Qeqertarsuup avataatungaani ukioq kingulleq misiliilluni qilleriviani, Greenpeacemeersut peersitaannisami tungaanut akunnerni 40-ni qillerivimmiipput. Maannalu Greenpeacermiut ukioq kingullermit marloriaammik sivisunerusumik qillerivik najorpaat.
Pissutsit suli allanngunngitsut vicepolitimesterip Morten Nielsenip ullap tungaa oqaatigaa.
- Suli oqaatigineqarsinnaanngilaq, qaqugu qanorlu politiit iliusseqassanersut. Taamatullu aamma oqaatigisinnaanngilara Cairn Energyp, Aatsitassanullu Naalakkersuisoqarfiup qanoq pisumut ilanngutinniassaneraatigut, vicepolitimester Morten Nielsen oqarpoq.
Cairn Energymit tusagassiuutinut oqaaseqartartumit David Nisbetimit radioaviisimut oqaatigineqarpoq, maanna Greenpeacemit Leiv Eirikssonip najorneqarnera, aasaanerani misiliilluni qillerinissamut sumilluunniit suli ajoqutaanngitsoq.
