Greenpeacekkormiut salloqittaavissorput
Greenpeacekkut uuliasioqatigiinni sulisut ilaat salloqittarlugit ataatsimeeqatigivaat, ataatsimiinnermilu tassani issuttumi uuliasiunnginnissaannut paasissutissanik oqalugiarfigalugit.
- Uuliasioqatigiit assigiinngitsut Aatsitassanut Ikummatissanullu Pisortaqarfimmik tunup avannaarsuani uuliasiorsinnaaneq eqqartorniarlugu ataatsimeeqatiginnikkiartorput. Tassunga atatillugu isumaqarsimavugut issittumi uuliasiorneq, ingammi sumiiffimmi pineqartumi tassani, aporfissanik ulikkaarnera ersersinniassallugu, tamaanimi sikorsuit annertunerupput ilulissat annerullutik silalu ingasannerulluni.
Greenpeacep issittumi sulisua Jon Burgwald oqarpoq. Illu Atlantikumut ataatsimiigiat takkummata natersuaaraq tummarfissaat uuliaterneqarsimavoq, issittumilu uuliasiortoqannginnissaanik oqariartuutilinnik allagartarsualersortoqarsimalluni. Aamma Illup Atlantikup eqqaani ikerasaliami allagartarsuarmik puttatitsipput. Aatsitassanut Ikummatissanullu Pisortaqarfimmi pisortap Jørn Skov Nielsenip ullumi malunnartitsisut qungujuutigiinnarpai.
- Inuit eqqissisimasuupput, allatulli akerliunerminnik isummaminnillu takutitsisinnaatitaapput. Ataatsimiinnermut ajoqutaasimanngillat. Aqqarngup qaangilaarnerani ataatsimiinneq aallartippoq, aqqanernullu ataatsimiigiaqqusisimalluta. Ajunngitsumik ingerlavoq, Jørn Skov Nielsen oqarpoq.
Taamaakkaluartoq Jon Burgwaldip malunnartitsinertik iluarisimaarpaa. Ingammik Greenpeacip ataatsimiigiat ilaat salloqittarlugit ataatsimiiffissamut allamut, Greenpeacep allatut atserluni attartorsimasaanut, isertimmagit. Tassani Greenpeacekkormiunit qilerniusalerlutik atisalersorluarsimasunit naapinneqarput, issittumilu uuliasioqqusinatik Greenpeacekkunniit oqalugiarfigitillutik. Saqqummiinerup seqersitaani kingullerpaami aatsaat Greenpeacekkormiuullutik imminnut ilisaritipput, uuliasioqatigiinniillu ataatsimiigiat aatsaat ataatsimiiffissavimminnukarlutik.
- Uuliasiornerit navianarsinnaasut qimallugit allanik siunissamut isiginerusunik aningaasaliiffissaannik ujarleqqullugit uuliasioqatigiit killissallugit unamminaqaaq, Jon Burgwald oqarpoq.
Inuit katillugit 70-t uuliasioqatigiinnit assigiinngitsuneersut ullumi ataatsimiinnernut peqataapput, ataatsimiinnerit 2012-imi 2013-imilu neqeroorutigineqartut pillugit ataatsimiinnerit siullersaraat.
Greenpeacekkut malunnartitsillutik aallarteqqammersut politiit takkupput natersuaq tummarfissaq uuliaterneqarsimasoq peeqqujartorlugu saleeqqusiartorlutillu, Greenpeacelu taamaaliorpoq. Taamaammat ullumi malunnartitsinerat inatsisilerinermut kinguneqarnavianngilaq.
