Greenpeacekkormiut annikitsunik akiligassinneqarput

- Sillimaniarneq eqqarsaatigalugu qanilleqqusaanngitsoq pillugu inatsisitigut atuutsitsisoqarnerani  Eqqartuussiviup isumaqatigimmatigut naammagisimaarparput, Helle Olsen, Politimestereqarfimmeersoq oqarpoq.

Qilleriviit eqqaani sillimaniarnikkut qanilleqqusinnginnerit pillugit, nunatsinni inatsisit aamma nunat tamalaat akornanni imartani atuunnerat eqqartuussivimmi uppernarsarneqarnerat neriuutigineqartutut pivoq.

Akerlianilli Nunatta Eqqartuussiviata aalajangiinera, Greenpeace-kkormiut ataasiakkaarlutik 20.000 koruuninik akiligassinneqarnerata annertussusaa nunatsinniillu anisitaanermik kinguneqartoq isumaqatigineqanngilaq. Greenpeacekkormiunut 18-inut, qillerivimmut qallorsimasunut upalungaarsimanissamullu pilersaarutit tunniunneqarnissaannik piumasaqarsimasunut akiligassiineq ullumi aalajangerneqarpoq inummut ataatsimut 4.000 koruuniussasoq.

Greenpeacekkormiulli kingulliit marluk ulluni sisamani qilllerivimmiissimasut innimiilliorsimanertik pissutigalugu taamaallaat 1.500 koruuninik akiligassinneqarput, eqqartuussivimmi isumaqanngimmat sillimaniarnermut atatillugu pallequsaanngitsoq unioqqutissimanngimmassuk, tassami peqqussut taakku qalloreernerisa kingorna aatsaat atuutsinneqalersimammat.

- Suliaq pillugu eqqartuussiviup isummersimanera iluarisimaarparput. Aammalumi akiligassiissutit angivallaarsoralugit naliliisimanerput maanna taperserneqarpoq, Jon Burgwald oqarpoq, naqissuserluguli aalajangernerup oqaasertai suli atuarsimanagit.

Kalaallit Nunaanni Politimesterip akiligassiissutit annertussusaat pillugit ingerlatitseqqinnissaq isumaliutersuutigingaa, Helle Olsenip ilisimatitsissutigaa.