Greenpeacekkormiut 18-it tigusarineqarput
Vicepolitimester Morten Nielsen oqarpoq tigusarineqartut Nuummukaanneqassasut.
"Angerlarsimaffimmi eqqissisimanermut kanngunarsaasutut" - tassa allap pigisaanut kimigiiserlutik isersimasutut - siullermik unnerluutigineqassapput. Taamatuttaaq maani inatsisinik unioqqutitsisimasutut aamma unnerluutigineqassallutik.
Politiit qillerivimmi Leiv Eirikssonimi qanoq iliuuseqarsimanersut vicepolitimesterip oqaatigerusunngilaa.
- Pinerluttulerinermi inatsisinik unioqqutitsisimasutut kingusinnerusukkut immaqa aamma unnerluutigineqassapput, qaquguussanersorli suli aalajanginngilarput, Morten Nielsen Nuummi politeeqarfimmeersoq oqarpoq.
Greenpeacermiut siullermik tassa akiliisinneqassapput. Nunani allamiunulli kiffartuussivik pisumut aamma akuliutsinneqassaaq, tamatumalu kingunerisinnaavaa iliuuseqarniat ilaatigut Ruluit Nunaanneersut, Hollandimeersut, Finalandimeersut Italiameersullu nunatsinniit peersitaasut.
Uuliakoortoqassagaluarpat upalungaarsimanissamut pilersaarummik tamanut saqqummiussequllugu Greenpeace uuliasioqatigiinnut piumasaqaraluarpoq, taamaaliunngimmatali tassa iliuuseqarput.
Avatangiisinik illersuiniat isumaqarput, qillerinerit ulorianaatilerujussuusut.
Uuliasioqatigiit Nunatta Kitaata avataani tallimanngormat marloriarlutik qilleripput. Ullorlu taanna sioqqullugu iliuuseqarniat marluk qillerivimmiittut tigusarineqarput.
