Greenpeace russit issittumi uuliasiortuinik akornusersueqqilersoq
Greenpeacep umiarsuaatini "Rainbow Warrior III" avalatsippaa, russit umiarsuaataat uuliamik assartuut "Mikhail Ulyanov" naapinniarniarlugu. Russit umiarsuaataata taanna uulia Issittumi qallorneqarnikoq Hollandimi Rotterdamimut assartuleruttorpaa.
Russit umiarsuaataat "Mikhail Ulyanov" maanna Norgep sineriaata avataaniippoq.
Mie Roer Jensenip saniatigut Greenpeace-imeersut allat "Rainbow Warrior III"-mi ilaapput. Greenpeacep umiarsuaataa alla "Arctic Sunrise" atorlugu avatangiisinik illersuiniaqatigiiffimmeersut Ruslandimit siorna tigusarineqarput, ujajaaniarsimasutut perullulliorsimasutullu pasineqarlutik tigummineqaraluarlutik.
Russit siorna septembarimi taama sakkortutigisumik iliuuseqarnerat anusinnguutigisimanngikkitsik, Greenpeacep Issittumut tunngasunut oqaaseqartitaata Jon Burgwaldip oqaatigaa:
- Uulia Issittup imartaaneersoq siullerpaamik assartorneqarpoq, avatangiisinik mianerinninnani tunisassiarineqarsimalluni. Tamanna malugitinniarparput, Jon Burgwald oqarpoq.
"Rainbow Warrior III"-mut ilaasut russit umiarsuaataannut ullualunnguit qaangiuppata anngukkumaartut, taassuma oqaatigaa, qanorli iliuuseqarniarnertik paasitikkusunnagu.
Umiarsuaq "Arctic Sunrise" russit sakkutuuinit siorna ikiffigineqarpoq, ilaasuilu kingorna tigusarineqarput, parnaarunneqarlutillu. Greenpeace-imeersut ullut 100-t sinnerlugit tigummineqareermata aatsaat iperagaapput. Taamaattorli Mie Roer Jensen tassa maanna aamma iliuuseqaqqilerpoq.
