Greenpeace qillerivimmut uteqqippoq
Siusinnerusukkut akerliuniarluni iliuuseqarnermi ikiuuttut qillerivimmut qallorput. Massakkulli Greenpeacep nunani tamalaani pisortaa Kumi Naidoo nammineerluni qillerivimmut qaqivoq, qillerivimmilu inuttat angerlaqqullugit kajumissaarlugit. Greenpeace taama ilisimatitsivoq.
Tamatumunnga peqatigitillugu, Kumi Naidoo atsiornernik, inuit nuarsuarmi tamarmeersut atsiornerinik 50.000-inik tunniussivoq, taakku uuliamik ujaasilluni qillerinerit unitsinneqarnissaat kissaatigaat.
Greenpeace ukiormanna pingajussaanik taamatut iliuuseqarpoq. Tassami siullermik maajip 29-anni aamma aappassaanik juunip sisamaani iliuuseqareerput.
Ullumikkut akerliuniarluni iliuuseqarnerminnut Greenpeace 570.000 koruunit missaannik akiliisitaassaaq. Tamannalu Kumi Naidoop nalunngilluinnarpaa.
- Taamatut iliorpunga Greenpeace allatut iliussalluni periarfissaqanngimmat, tusagassiuutinut nalunaarummi Kumi Naidoo taama issuarneqarpoq.
Kumi Naidoo akerliuniartorlu alla, ullaaq nalunaaqutaq arfineq pingasut qaangilaaraa politiinit tigusarineqartut, ullumikkullu Nuuliaanneqassasut politimesterip tullersortaa Morten Nielsen nalunaarpoq.
