Greenpeace qillerinissamut isornartorsiuivoq

Uuliamik misiliilluni Qeqertarsuup Diskop avataani qillerinissamut Namminersorlutik Oqartussat akuersinerat Avatangiisinik Illersuiniaqatigiiffiup Greenpeacep maanna isornartorsiorpaa.
juulip 02-at 2010 07:07

- Qillerinissamut Namminersorlutik Oqartussat akuersigamik kukkorujussuarlutik naliliisimassapput, ajutoornersuartut taaneqarsinnaasumik, uuliamik maqisoorujussuarnermik, BP-ip misigisaatut ittumik pisoqarsinnaanera eqqarsaatigeqqaanngivillugu, Greenpeace Nordicip qullersaa, Mads Flarup Christensen, tusagassiuutinut allappoq.

Qeqertarsuup Diskop avataani misiliillutik qillerisussat, skotlandimiut Cairn Energy, Greenpeacep aamma isornartorsiorpai:

- Qillerineq aallartippat minnerpaamik marlunnik qillerussuaqarnissaa Kalaallit Nunaanni oqartussaasut immikkut piumasarereerpaat, ajutoortoqassagaluarpat oqilisaasinnaasunik. Greenpeacep ullumi paasivaa qillerussuaq qillerivimmi ataasiinnaasoq, qillerinerlu ippassaq aallartippoq, aamma paasivarput ullorpassuit tulliuttut qillerussuup aappaa ikkunneqarnavianngitsoq, Mads Flarup Christensen oqarpoq.