Greenpeace: Politiit ernummatissaqanngillat

Greenpeace-p umiarsuaa, Arctic Sunrise nunatta sineriaa atuarlugu angalavoq, politiinillu malinnaavigineqarpoq. Greenpeacep siornatigut akerliussutsimik takutitsisarsimanera ilaatigut pissutigalugu:

- Kingullermik Greenpeace nunatsinniimmat assigiinngitsunik pisoqarpoq politiinit aaqqiivigineqartariaqarsimasunik, taamaattumik ukioq manna politiit iliuuseqarnissaminnut piareersimatinneqarput, nunatta politimesteria Anders Linnet oqarpoq.

Greenpeace 2001-imi nunatsinniippoq, taamanikkut Pituffimi radareqarfiup allisarniarneqarneranut pilersaarutit akerliliiffiginiarlugit.

Inuit Greenpeace-meersut sisamat radareqarfimmut iserterput, naak danskit naalagaaffimmut pissutsinut ministereqarfiannit akuersissummik pinngikkaluarlutik.

Akerliussutsiminnik takutitsiniarlutik Dundasimi erfalasuliipput, politiinilli peeqquneqarnermik kingorna qimagullutik.

Politimesterillu erseqqissarpaa piareersimanerarlutik:

- Politiitut pisinnaatitaaffigut ilisimaarilluarpavut, piareersimavugullu pinartumik pisoqassagaluarpat, Anders Linnet oqarpoq.

Greenpeacep umiarsuaanni Arctic Sunrise-mi naalakkap Arne Sørensenip oqaatigaa politiit ernummatissaqanngitsut, ullullu tamaasa attaveqarfigisarnerarlugit:

- Aalajangersimalluinnaqqissaartumik politiit attaveqarfigisarpavut, politiimmi ilisimasariaqarpaat pinartumik pisoqassagaluarpat sumiinnersugut, umiarsuup naalagaa Arne Sørensen oqarpoq, erseqqissaatigalugulu unioqqutitsinertut nalilerneqarsinnaasunik iliorniaratik:

- Kalaallit Nunaanniippugut silaannaap pissusiata allanngoriartornera uppernarsarniarlugu misissuilluta, Arne Sørensen nassuiaavoq.

Greenpeacep umiarsuaataa Arctic Sunrise Tunumi nunattalu kitaani angaalaassamaarpoq, avannamut Ilulissat tikillugit angalassalluni.

Ulluni makkunani Johan Petersenip Kangerluaniipput, Tasiilap illoqarfittaata kimmut kujasissortaaniillutik.