Greenpeace oqallinnissamut aggersaavoq

'BP-p iliorneratut Cairn Kalaallit Nunaanni iliorteqinasiuk'. Nuummi allagartanik nivinngaavinni taama allassimasut takussaalerput.

Cairn Energyp misiliilluni qillerinerinut mianersoqqusinerit imaaginnavissut, ulluni makkunani Greenpeacep tamanut paasissutissiarisarpaat.

Mexicop Kangerliumanersuani BP-p uuliamik maqisoornera Cairn Energyp misiliilluni qillerinerinut allagartarsuarni Nuummi nivinngaatiterneqarsimasuni taama sanilliussillutik allaaseraat.

Cairn Energy suliffeqarfissuarmik ingerlatsivissuarmut BP-mut, tusaamanerlutaalersimasumut, Greenpeacep sanilliussinera qanormita Cairn Energyp oqaaseqarfigissavaa?

Cairn Energyp aningaasarsiornermut aamma inatsisilerinermut pisortaata, Simon Thomsonip tamanna ima akivaa:

- Kikkut tamarmik isummaminnik annitsisinnaapput. Unali malugeqqussavara. Kalaallit Nunaanni Naalakkersuisunit qaaqquneqarluta maaniikkatta. Qillerinerni isumannaallisaanerit pitsaanerpaat Naalakkersuisunit piumasarineqarsimasut malippavut, isumannaallisaanerillu nunarsuatsinni pitsaanerpaat maleqquneqartut malillutigit. Taakkulu toqqammavigalugit misiliilluta qillerinerit ingerlappavut, Simon Thomson oqarpoq.

Tamanut oqallitsitsineq Katuami ingerlanneqartussaq unnugu nalunaaqutaq arfineq marlunut aallartissaaq.